Immiussaq nutaaq, Grønlandsruten – Kalaallit Nunaata Danmarkillu oqaluttuarisaanikkut atassuteqarnerat FN-ip nunat inoqqaavisa ulluanni, aggustip 9-iani 2026, atulersinneqassaaq.

FN-ip nunat inoqqaavisa ulluanni aggustip 9-iani 2026 Stromma-p Mellemfolkeligt Samvirke kiisalu Uagut – Landsorganisationen for Grønlændere i Danmark suleqatigalugit immap aqqutaatigut angalaqatigiinneq nutaaq immiussamik nassuiaatitalik atulersissavaa. Angalaqatigiinnermi ilaasut Københavnip Kalaallit Nunaatalu atassuteqarnerat paasisaqarfiginerusinnaavaat.

 Grønlandsruten – Kalaallit Nunaata Danmarkillu oqaluttuarisaanikkut atassuteqarnerat immap aqqutaatigut isigalugu Kalaallit Nunaata kalaallillu Københavnimi assigiinngitsutigut sunniuteqarsimanerat takutittassavaa – tamatuma saniatigut ullutsinni Kalaallit Nunaata Danmarkillu assigiinngitsutigut atassuteqarnerat takutinneqartassaaq.

Ilaasut akunnerup ataatsip ingerlanerani Københavnip umiarsualiviatigut immap aqqutaatigullu angalaqatigiissapput.

Angalaqatigiinnerup nalaani Københavnimi Kalaallit Nunaannut ilisarnaatit malunnartut malunnarpianngitsullu pillugit paasititsiniaasoqassaaq: Angalaqatigiinneq Nordatlantens Brygge-mi aallartissaaq, ilaatigut Den Grønlandske Handels Plads, Christiansborg, Nationalmuseet kiisalu Christiania aqqusaarneqassallutik. Angalaqatigiinnerup nalaani eqqumiitsuliat, eqqaassutissiat, oqaatsit oqaluttuallu eqqartorneqassapput.

Ivalo K.B.F. Olsvig-ip immiussaq oqaasertalersimavaa. Ivalo K.B.F. Olsvig Kalaallit Nunaat Issittorlu pillugit cand.mag.-iuvoq kiisalu Københavnip Universitet-iani katersugaasivilerinermik (museologi) immikkut ittumik ilinniagaqarsimalluni.

Ulluinnarni namminersortuuvoq, Kalaallit Nunaata oqaluttuarisaanera kulturialu pillugit saqqumiisarlunilu siunnersuisarluni. Saqqumiisarnermini siunnersuisarnerminilu Kalaallit Nunaata nunasiaataasimanera kiisalu Kalaallit Nunaata Danmarkillu atassuteqarnerat sammisarpai.

”Immap aqqutaatigut angalaqatigiinnermut atatillugu immiussaq oqaluttuarisaanermi tunngavilimmik, paasiuminartumik kiisalu qallunaanut, kalaallinut allamiunullu pissarsiaqarnartuutillugu sananiarsarisimavara. Kalaallit Nunaata Danmarkillu atassuteqarnerat inuit, sumiiffiit assigiinngitsut ullutsinnilu Københavnimi oqaluttuarisaanermut atassuteqartut assigiinngitsut oqaluttuarineqarnissaat siunertarisimavara. Umiarsualivikkooraanni oqaluttuarisaaneq atuakkanut allagaateqarfinnullu kisimi atassuteqannginnera ersarippoq. Oqaluttuarisaaneq illuni, eqqumiitsuliani, eqqaassutissiani, oqaatsini illoqarfiullu sumiiffiini assigiinngitsuni takuneqarsinnaavoq,” Ivalo K.B.F. Olsvig oqarpoq.

Immiussaq Stromma-p app-iatigut qallunaatut, tuluttut kalaallisullu pissarsiarineqarsinnaassaaq. Isiginnaartitsisup Karina Møller-ip immiussimavaa.

Københavnip oqaluttuarisaanerani pingaarutilik sammineqassaaq

Grønlandsruten-ip 1721-imi nunasinerup aallartiffia eqqartussavaa, ilaatigut niuerneq, ajoqersuiartorneq, eqqumiitsuliat, Issittumi ilisimasassarsiorneq, sorsunnerit, nutarterineq minnerunngitsumillu namminersornerulerneq eqqartorneqassallutik. Ullutsinni kinaassuseq, aalajangiisinnaatitaaneq naligiissitaanerlu aamma eqqartorneqassapput.

Angalaqataasut kalaallit oqaasii, oqaluttuaat kulturiallu pillugit paasisaqarnerusinnaapput – assersuutigalugit qaannat, nannut kiisalu Sassuma Arnaa pillugit.

”Grønlandsruten aqqutigalugu Københavnip oqaluttuarisaanerani pingaarutillip ulluinnarnilu takuneqanngitsoortartup sammineqarnissaa kissaatigaarput. Grønlandsruten-imi ilaasut illoqarfikkut nuannersumik angalaqatigiissapput, ilaatigullu ukiut hunnorujulikkuutaat ingerlaneranni inuit, sumiiffiit assigiinngitsut, nioqqutissat, isumassarsiat kiisalu Københavnip Kalaallit Nunaatalu atassuteqarnerat aamma paasisaqarfiginerusinnaavaat. Kalaallit isiginnittaasaat aqqutigalugu Kalaallit Nunaat pillugu paasititsiniaanermi Ivalo-p ilisimasai pingaaruteqarluinnarsimapput,” Jesper Stanley-Hald, Stromma Danmark-imi Head of Commercial oqarpoq.

’Grønlandsruten’ Kalaallit Nunaat nalliuttorsiorniarlugu qajartoqatigiinnermut atatillugu atulersinneqassaaq. Uani paasisaqarnerusinnaavutit: https://ms.dk/da/kajakparade

København Kalaallit Nunaallu atassuteqarnerat pillugu tamanna ilisimaviuk?

1. Immap Danmarki Kalaallit Nunaallu avissaaginnartarsimanngilai - ataqatigiinnerulersittarsimavai

Ukiut hunnorujulikkuutaat ingerlaneranni inuit, nioqqutissat, isumassarsiat oqaluttuallu Københavnip Nunattalu akornanni ingerlaartarsimapput. 

2. Siornatigut Nordatlantens Brygge nioqqutissat Nunatsinneersunut, Savalimmiuneersunut Islandimeersunullu quersuartut atorneqartarsimavoq

Orsoq, amiit, aalisakkat, arferillu soqqaat Nordatlantens Brygge-mi inissinneqartarsimapput, kingornalu Europamut ingerlateqqinneqartarsimallutik. Ullutsinni Nordatlantens Brygge kulturip illuatut atorneqartarpoq. Namminersorlutik Oqartussat Danmarkimi sinniisoqarfiat tamaani aamma inissisimavoq. 

3. Kalaallit marluk Københavnip imartaani 1724-imi takutitsisimapput

Pooq aamma Qiperoq tassaasimapput kalaallit siulliit namminneq piumasaminnik Nunatsinnit Danmarkimut aallarsimasut. Københavnimiut tuusintilikkuutaat isiginnaartillugit qajartoqatigiillutik kalaallit piniartariaasaat takutikkamikku assut soqutigineqarsimapput. 

4. Eqqumiitsuliaaqqat Kalaallit Nunaannut ilisarnaataasut

Københavnimi sumiiffinni assigiinngitsuni eqqumiitsuliaaqqat Landic Project-ip sanaavi takuneqarsinnaapput. Eqqumiitsuliaaqqat kalaallit kulturiannut ilisarnaataapput, illoqarfiullu sumiiffiini assigiinngitsuni Nunatsinnut eqqaasitsisuullutik. 

Paasissutissat

Grønlandsruten Stromma-p imakkut angalaqatigiisitsisarnerani tamani aggustip 9-ianit 2026 atulersinneqassaaq. City’s Voice-p app-iani nassaarineqarsinnaavoq. 

Stromma pillugu

Stromma angalaqatigiinnernik kiisalu Hop On-Hop Off bussertitsisarnernik aaqqissuussisuuvoq, ilaatigullu Københavnimi immami misigisassanik assigiinngitsunik aamma aaqqissuussisarluni. Stromma Københavnip immap aqqutaatigut misigisassanik aaqqissuussisartutut aallartissimavoq - 1904-imi bussit imakkoortut akisussaaffigisimavaat. Ullutsinni inuit 500.000-it sinnerlugit ukiumut Stromma imakkut angalaqatigalugu København misigisarpaat.

Stromma Danmark Stromma Group-imi ilaavoq. Stromma Group tassaavoq Europap Avannaani takornariaqarnermut ingerlatsiviit pingaarnerpaasa ilaat. Stromma Group-ip Danmarkimi, Sverigemi, Norgemi, Finlandimi, Hollandimilu takornariaqarnikkut misigisassat assigiinngitsut aaqqissortarpai.