Aggustip 9-iat 2026 Uagut-ip – Landsorganisationen for Grønlændere i Danmark – aamma Mellemfolkeligt Samvirke-p København-ip umiarsualivia qajanik, tusarnaartitsinernik, Kalaallit Nunaata erfalasuanillu FN-ip nunat inoqqaavisa ulluannut atatillugu ulikkaartissavaat. Qallunaat kalaallillu ataatsimoorlutik illoqarfikkut qajartussapput, tassanilu kalaallit kulturiat nalliuttorsiorlugu Kalaallit Nunaanni Danmark-imilu inuit ataatsimoortissavaat. 

”Qajaq kalaallit kulturiannut kinaassusaannullu annertuumik ilisarnaataavoq. Ukiut tuusintilikkuutaat iluini Kalaallit Nunaanni inuunermut atassuteqarsimavoq. Tamanna saniatigut qallunaat amerlasuut sunngiffimminni timersoraangamillu qajartortarput – Kalaallit Nunaannut kalaallillu kulturiannut soqutiginninneq alliartuinnarpoq. Taamaattumik qajaq inunnik ataatsimoortitsinermut, oqaloqatiginnermik pinngortitsinissamut kiisalu Kalaallit Nunaata Danmark-illu ataatsimoornerulernissaannut atorneqarsinnaavoq,” Julie Rademacher, Uagut – Landsorganisationen for Grønlændere i Danmark-imi pisortaq oqarpoq. 

Immami tusarnaartitsineq qilaatersornerlu

Erinarsoqatigiit Inuanima qajartornermi saarliullutik angalaqataassapput, erinarsoqatigiinni nipilersortartoq uaajeertartorlu affarmik kalaaleq Aviaja Lumholt umiarlummi ilaassalluni. Angalanerup nalaani umiarluk Nordatlantens Brygge-mi, Ofelia Plads-imi kiisalu Sandkah-imi Nordhavns Bassin-ip eqqaaniittumi tulassaaq. Tassani Inuanima isiginnaartunut peqataasunullu takutitsissapput. Kalaallit oqaluttuaat, qilaatersorneq kiisalu nutaajunerusumik nipilersorneq aallaavigalugit ullormut nalliuttorsiornermi peqataassapput.

Qajartortut qajartortartut klubbiat Qajak København-imeersut namminneq qajaliatik nassarlugit peqataassapput. Nordatlantens Brygge-mi kalaallit qajartornermut kulturiat immikkut ittumik paasisaqarfigineqarsinnaavoq: Tassani qajaliortartoq Svend Ulstrup qajaliussaaq. 

Qajartorlutik takutitsisut Nordatlantens Brygge-mi aallartissapput, Ofelia Plads-ikkoorlutik Nordhavns Bassin-imi Sandkaj-ip eqqaaniittumi taamaatissallutik. 

Pisussaq tamanut ammavoq. Peqataasut namminneq qajatik imaluunniit qajamik attartorlutik peqataasinnaapput. Isiginnaartut Nordatlantens Brygge-mi, Ofelia Plads-imi kiisalu Sandkaj-imi Nordhavns Bassin-ip eqqaaniittumi peqataasinnaallutik. 

Ataqqinninneq misiginneqataanerlu ataatsimoorluta nalliuttorsiussavagut

Stromma suleqatigalugu Kalaallit Nunaat pillugu qajartorlutik takutitsineq pinngortinneqarnikuuvoq. Takutitsinermi Stromma Kalaallit Nunaata erfalasua angalanermini amussavaa. 

”Kalaallit Nunaata sakkortuumik pineqarnerata naalagaaffeqatigiiffimmi innuttaasut ataatsimoortinnerulersimavai. Januaarimi inuit 50.000-it missaanniittut Danmark-imi Kalaallit Nunaannilu Kalaallit Nunaat tapersersorumallugu malunnarluinnartumik akerliussutsimik takutitsipput. Maannakkut malugaarput inuit amerlasuut qallunaat kalaallillu ataatsimoortikkusulernikuugaat. Tapersersuineq maannakkut ataatsimoorfissanut, kulturikkut naapeqatigiinnissamut misigisassanullu atorusupparput. Qajartornikkut takutitsineq Kalaallit Nunaat ataqqillugu misiginneqatigalugulu nalliuttorsiorneruvoq” Tim Whyte, Mellemfolkeligt Samvirke-mi generalsekretæri oqarpoq. 

Qajartornikkut takutitsineq København-imi Kalaallit Illuutaat, Qajak København, Grønlands Selvstyre, Kayak Bar, Dansk Kano og Kajak Forbund, Kulturdistriktet, By & Havn, Kajakhotellet aamma Stromma suleqatigalugit pinngortinneqarnikuuvoq. 

Paasissutissat

Qajartornikkut takutitsineq FN-ip nunat inoqqaavisa ulluannut aggustip 9-iani 2026 atatillugu aaqqissorneqarnikuuvoq. 

Takutitsineq Nordatlantens Brygge-mi nal 13.30 aallartissaaq, ilaatigut Ofelia Plads aamma Sandkaj Nordhavns Bassin-ip eqqaaniittoq aqqusaassallugit. 

Takutitsineq Uagut – Landsorganisationen for Grønlændere i Danmark-imit aamma Mellefolkeligt Samvirke-mit aaqqissuussaavoq. 

Nammineq qajat imaluunnit Kajakhotellet-imit qajamik attartorlutit peqataasinnaavutit. Nunamiilluni nalliuttorsiornermi aamma peqataasoqarsinnaavoq.