KALAALLIT DANMARKIMIITTUT NUNA TAMAKKERLUGU KATTUFFIATA MALITTARISASSAI

§ 1. ATEQ INISSISIMAFFILLU

1.1 Peqatigiiffiup atia tassaavoq ”Landsorganisation for Grønlændere i Danmark” – ”Uagut”-imik aamma taaneqartartoq. Tamanna maannamit ”peqatigiiffik”-mik taaneqalissaaq.

1.2 Peqatigiiffik Danmark-imi inissisimavoq.

1.3 Peqatigiiffiup sullitai tassaapput nunat inoqqaavi taaguutit ”Kalaaleq” aamma ”Inuit” atorlugit taaneqartartut. Nunat inoqqaavi taaguutit ukua marluk atorlugit imminnik aamma taasarput. Taamaattumik taaguutit ”Kalaaleq” aamma ”Inuit” ileqqoreqqusani ukunani assingiimmik isumaqartippagut. ”Inuit” tassaapput inuiaat Kalaallit Nunaanneersut.

§ 2. SIUNERTAQ

2.1 Peqatigiiffiup kalaallit pisinnaatitaaffii, atugarissaarnerat Danmark-imilu kulturiminnut atassuteqarnerat siuarsarpai.

2.2 Peqatigiiffiup kalaallit ataatsimoornissaat siuarsarpaa. Saniatigut naligiisitaanermik, sinniisoqarnermik taavalu Danmark-imi kalaallit kulturiannik inuiattullu inissisimanerannik paasititsiniaalluni suliniuteqarpoq.  

2.3 Paasititsiniaanikkut, attaveqarfitsigut, siunnersuinikkut kiisalu suliniuteqartartut aalajangersimasut suleqatigalugit peqatigiiffik ukunanik suliniuteqartarpoq: a) Kalaallit Danmark-imi najugallit immikkoortitaasarnerat akiorlugu kalaallit periarfissaqarnerulernissaat; b) Ataatsimoornikkut, kulturikkut ilinniarnikkullu iliuuseqarneq; c) Ataatsimoorfinnik pinngortitsineq taavalu kulturikkut tulluusimaarnerulernissaq anguniagaralugu susassaqartitsineq; d) Danmark-imi inuiattut oqallittarnermi oqartussaasullu akornanni kalaallit sinniisoqartarnissaat

2.4 Peqatigiiffik namminersortuuvoq partiinullu atassuteqanngilaq. Ataqqinninneq; akuutitsineq; naligiissitsineq kiisalu aalajangeeqataaneq naleqartitaralugit suliniuteqarpoq.

§ 3. ILAASORTAANEQ

3.1 Inuk kinaluunniit Danmark-imi najugalik peqatigiiffiup siunertaanik tapersersuisoq, Kalaallit Nunaanni sorlaqartoq imaluunniit kalaallisut kinaassuseqartoq ilaasortanngorsinnaavoq.

3.2 Ilaasortat assigiinngitsut ima aaqqissugaapput: a) Immikkut ittumik ilaasortat; b) Ilaqutaariiullutik ilaasortat; c) Tapersersuillutik ilaasortat (peqatigiiffiit, suliffeqarfiit il.il)

3.3 Ataatsimeersuarnermi ilaasortaanermut akiliutit (kontingenti) aalajangerneqartarput. Tamanna siulersuisunit aaqqisugaasarpoq. 

3.4 Ilaasortaajunnaarneq peqatigiiffik allaffigalugu pisarpoq. Tamanna ukiup sisamararterutaasa taamaatinneqarnissaannut qaammat kingullermi kingusinnerpaamik pissaaq.

3.5 Siulersuisut ilaasortaq ileqqoreqqusanik siunertanilluunniit unioqqutitsippat peqatigiiffimmit anisissinnaavaat. Ilaasortap anisitaasimanini pillugu ataatsimeersuarnerup tulliani siunnersuisunut maalaaruteqarnissaq pisinnaatitaaffigaa. 

3.6 Ilaasortat tamarmik Danmark-imi najugaqartussaapput. Ilaasortat Danmark-imit nunamut allamut nuulerunik nammineq ilaasortaajunnaarnertik nalunaarutigissavaat.

§ 4. PEQATIGIIFFIUP AAQQISSUGAANERA

4.1 Peqatigiiffik sisamanik immikkoortortaqarfeqarpoq : a) Generalforsamlingi; b) Siulersuisut; c) Ingerlatsivik; d) Sulisut; e) Ilaasortat; f) Advisory Board (Siunnersuisut)

§ 5. GENERALFORSAMLINGI / ATAATSIMEERSUARNEQ

5.1 Generalforsamlingi tassaavoq peqatigiiffiup qullersaqarfia

5.2 Ataatsimeersuarneq ukiumut ataasiaq apriili naatinnagu pisarpoq

5.3 Ataatsimeersuarnissamut qaqqussut mail-ikkut nassiunneqartarpoq. Ataatsimeersuarnissamut sapaatip akunneri sisamaannanngoraangata qaaqqussut siusinnerpaamik ilaasortanut nassiunneqartarpoq. Qaaqqussut peqatigiiffiup nittartagaanut inoqatinullu attaveqaatinut aamma ikkunneqartarpoq. Qaaqqussut ataatsimeersuarnermi oqaluuserisassanik ataatsimiiffissamillu imaqartarpoq.

5.4 Ataatsimeersuarnermi oqaluuserisassat minnerpaamik ukuninnga imaqassapput: a) Ataatsimiinnermik aqutsisoq nalunaarusiortorlu; b) Siulersuisut nalunaarutaat; c) Ukiumut naatsorsuutit inerneri pillugit nalunaajaat akuersissullu; d) Missingersuutit ukuninngalu akuersissut, ilaasortaanermut akiliutit ilanngullugit; e) Siunnersuutinik akuersissut; f) Siulersuisut ilaasortanik sinniisussanillu toqqaanerat; g) Naatsorsuuserisumik toqqaaneq; h) Allat

5.5 Ataatsimeersuarnermi oqaluuserisassanngortikkusutanut siunnersuutit ataatsimeersuarnissamut sapaatip akunneri marluinnanngortillugit kingusinnerpaamik siulersuisunut nassiunneqassapput.   

5.6 Ilaasortat tamarmik ilaasortaanermut akiliisimasut qinerseqqusaapput. Ilaasortat ataasiakkaat ilaqutariiullutillu ilaasortat qinersinermi ataatsimik taasisinnaatitaapput. Tapersersuillutik ilaasortat oqaaseqarsinnaapput, qinerseqqusaanngillalli.

5.7 Allamik nalunaaruteqartoqarsimanngippat, qinersinermi amerlanerussuteqartut aalajangiissapput.  

5.8 Ilaasortat qinerseqqusaasut 2/3-iat amerlanerussuteqarangata ileqqoreqqusat taamaallaat allanngortinneqarsinnaapput.

5.9 Pisinnaatitsissutigut qinersisoqaqqusaanngilaq. Qarasaasiakkulli peqataasoqarsinnaallunilu qinersisoqarsinnaavoq.

§ 6. ATAATSIMEERSUARNEQ IMMIKKUT ITTOQ

6.1 Siulittaasut ataatsimeersuarnissamut immikkut ittumut qaaqqusisinnaapput. Ilaasortat 1/4-iat piumagunik allakkatigut qinnuteqarlutik oqaluuserisassallu nalunaarutigalugit ataatsimeersuarnissamut immikkut ittumut qaaqqusisinnaapput.  

6.2 Ataatsimeersuarnissamut qaaqqussut qinnuteqaatip tiguneqarneranit kingusinnerpaamik sapaatip akunneri marluk iluini nassiunneqassaaq. Oqaluuserisassat tiguneqarnerannit siusinnerpaamik sapaatip akunneri marluk iluini qaaqqussut nassiunneqassaaq.

§ 7. SIULERSUISUT

7.1 Ilaasortat 5-7 siulersuisuni ilaasortaasarput. Ilaasortat ataatsimeersuarnermi toqqarneqartarput, ilaasortallu ukiut marluk siulersuisuniittarlutik. Taamatut ukioq affakkaarlugu qinersisoqartassaaq.

7.2 Siulersuisut ataatsimik siulittaasoqarput, siulittaasoq ataatsimik tulleqarpoq, siulersuisut aningaaserisoqarput taavalu 2-4-nik naliginnaasunik ilaasortaqarlutik.

7.3 Siulersuisut sinniisoqarnissaq qulakkiissavaat, minnerpaamillu Kalaallit Illuutaannit ataatsimik ilaasortaqarnissaq qulakkiissavaat.

7.4 Ataatsimeersuarnerup kingorna siulersuisut ataatsimiinnerminni (siulittaasoq, siulittaasup tullia, aningaaserisoq) namminneq inissititertarput.  

7.5 Siulersuisuni ilaasortaasut affaat isersimatillugit siulersuisut aalajangeeqqusaapput.

7.6 Siulersuisut amerlanerussuteqarnermi aalajangiisarput. Qinersinikkut naligiittoqassappat, siulittaasup qinersinera inerniliisarpoq.

7.7 Siulersuisut qinersillutik malittarisassat namminneq aalajangertarpaat.

7.8 Ataatsimeersuarnerup kingorna ataatsimeersuarnissallu tulliata tungaanut siulersuisut peqatigiiffiup ingerlanneqarnera aningaasaqarneralu isumagisassavaat.

7.9 Pisariaqaraangat siulersuisut ataatsimiititaliorsinnaallutillu suleqatigiissitaliorsinnaapput.

§ 8. NALINGINNAASUMIK AQUTSINEQ

8.1 Peqatigiiffiup nalinginnaasumik aqunneqarnera aqutsisunit ukunanit isumagineqartarpoq: a) Qullersaqarfik; b) Allaffeqarfik; c) Attaveqaqatigiinnikkut sulisut; d) Aningaasaqarnikkut sulisut

8.2 Nalinginnaasumik aqutsisut pisortamit isumagineqartarput. Siulersuisut pisortaq toqqartarpaat

8.3 Pisortap peqatigiiffiup nalinginnaasumik aqunneqarnera akisussaaffigaa, saniatigullu siulersuisut aalajangernikuusaat atuutilerneqarnissaat aamma akisussaaffigaa

§ 9. SULISOQARNEQ

9.1 Peqatigiiffik assigiinngitsunik sulisoqarsinnaavoq, ukunani ilaallutik: a) Sulisut nalinginnaasut (piffissaq tamakkerlugu sulisorisat imaluunniit ullup ilaannaa sulisorisat); b) Attaveqaqatigiinnikkut sulisut; c) Ataqatigiissaarisut

9.2 Peqatigiiffiup sulisuisa suliassat killilersukkat assigiinngitsut suliarisarpaat

9.3 Peqatigiiffiup sulisui pisortamut nalunaartarput

§ 10. ILAASORTAQARNIKKUT SULISUT

10.1 Peqatigiiffik assigiinngitsunik ilaasortaqarnikkut sulisoqartarpoq: a) Ilaasortat nalinginnaasut; b) Susassaqartitsinerni nalinginnaasuni sulisut; c) Ilisimatusartut, misilittagartuut kiisalu ataatsimiititaliat.

10.2 Ilaasortaqarnikkut sulisut peqatigiiffiup ilaasortaanut tulluarsakkanik susassaqartitsinerit isumagisarpaat

§ 11. ATSIORSINNAATITAASUT

11.1 Peqatigiiffimmi pisortaq siulersuisunilu ilaasortaq atsioqatigiittarput

11.2 Siulersuisuni ilaasortaq aalajangersimasoq atsioqquneqarsinnaavoq (prokura)

§ 12. ANINGAASAQARNIKKUT AKISUSSAAFFIK

12.1 Aningaasaqarnikkut akisussaaffik peqatagiiffiup taamaallaat tigusinnaavaa

12.2 Ilaasortat - siulersuisut ukunani ilaapput - peqatigiiffiup akisussaaffii inuinnartut tigusinnaanngilaat

§ 13. NAATSORSUUTIT KUKKUNERSIUINERLU

13.1 Peqatigiiffiup naatsorsuisarnera ukioq ilivitsoq malittarpaa 

13.2 Ukioq naatsorsuiffik aallartiffimmit decembarip 31-iata tungaanut ingerlasarpoq

13.3 Naatsorsuutit kukkunersiorneqarsimasut - missingersuutit ilanngullugit - ataatsimeersuarnissamut kingusinnerpaamik ullut 14-inngornerini ilaasortanut nassiunneqassapput

13.4 Ataatsimeersuarnermi naatsorsuuserisoq ukioq ilivitsoq sulisussaq toqqarneqartarpoq. Naatsorsuuserisoq pisortanit akuerineqassaaq

§ 14. ATORUNNAARSINNEQARNEQ

14.1 Peqatigiiffik atorunnaarsinneqassappat tamanna immikkut ittumik ataatsimeersuarnermi taamaallaat aalajangerneqarsinnaavoq. Taamaasiornermi peqatigiiffiup atorunnaarsinneqarnissaa ataatsimeersuarnermi oqaluuserisassatuaassaaq.

14.2 Peqatigiiffik atorunnaarsinneqassappat ataatsimeersuarnermi peqataasut qinerseqqusaasut 2/3-imik amerlanerussuteqartariaqarput. Ataatsimeersuarnerni assigiinngitsuni marlunni sapaatip akunneri sisamanik avissaaqqasuni amerlanerussuteqarlutik taasisimasut peqatigiiffik taamaallaat atorunnaarsissinnaavaat.

14.3 Peqatigiiffik atorunnaarsinneqassappat, peqatigiiffiup aningaasaatai kalaallit Danmark-imi najugalinnut iluaqutaasussamut atorneqassapput. Atorunnaarsinneqarnermi ataatsimeersuarnermi peqatigiiffiup aningaasaatai sumut atorneqassanersut aalajangerneqassaaq.

§ 15. ATUUTILERNEQ

15.1 Ileqqoreqqusat siullerpaamik maajip 3-iani 2025 peqatigiiffiup pinngortinneqarnerani atuutilerput. Martsip 24-iani 2026 ataatsimeersuarnermi nutarterneqarput.