Kiisami utoqqatsernermut qujanaq - piffissanngorpoq!

Qallunaanut apeqquteqalaarniarpunga: Illit panigigukku, ikinngutigigukku, anaanagigukku imaluunniit suleqatigigukku piumassuserinngisaminik akuersiteqqaarnagu spiralimik

ikkussiffigineqarsimasoq, inuiaqatigiit qanoq qisuariarnissaat naatsorsuutigissagaluarpiuk? 

Ministeriunermut qujanaq, Naalakkersuisut siulittaasuannut qujanaq aammalu qujanaq ullumikkut Danmarkimi nunatsinnilu politikerinut, kinguaariit siulliit kukkussutaat pillugu akisussaaffimmik tigusigassi. 

Uagutsinnut kalaallinut tamanna misilittagarpassuatta akornannut ilaaginnarpoq, tassa uagutsinnut assigiinngisitsisoqartarneranut namminerlu aalajangiisinnaassusitsinnik arsaarneqartarnitsinnut. Pingaaruteqarpoq utoqqatserneq iluaqutigalugu oqartussat illersuinissaannut tatiginnissinnaanissarput, atornerlunneqannginnissarpullu. 

Pingaaruteqarpoq inuttut immitsinnut inuiaqatigiinnullu peqataaffigisatsinnut tatiginnissinnaanissarput. Taamaattumik pingaaruteqarpoq politikerit, kattuffiit, angajoqqaat innuttaasullu tamatta immitsinnut akisussaaffimmik tigusinissarput - tassami tamatta inuuvugut. Ilisimasariaqarparput taamatut pisoqaqqissanngitsoq killissagullu qaangerneqarsimammata. Taamaattumik qujanaq utoqqatsernissinnut - piffissanngorpoq.

• Uagut-mi ilaasortaqarpoq spiralimik suliami ilanngunneqarsimasunik sulilu ilaasunik, aamma arnat spiralilersinnikut tapersersorpagut. Arnat amerlasuut eqqunngitsumik ajorluinnartumillu pineqarsimasut eqqarsaatigisarpagut. Utoqqartsertoqarnerani arnat oqaluttuassaat, killilersugaasimanerat anniaateqarsimanerallu akuersaarneqarput, arnallu taakku tapersersorpagut.

  
  

• Nuannaarutigeqaarput oqiliallutalu maanna utoqqatsertoqarmat, aammalu Ministeriunermit Naalakkersuisullu Siulittaasuannit utoqqatsertoqarnerani takutinneqarpoq, pisimasoq Danmarkimi Kalaallillu Nunaanni oqartussaasuinit iliuuserineqarsimammat. Saniatugut erseqqissaatigissavarput Kalaallit Nunaanni Danmarkimilu kalaallinut arnanut tamanna pisimammat.

  
  

• Siornatigut assigiinngisitsisoqartarsimanera akuersaanngilarput, soorlu ullumikkut aamma taamaattoqartoq, neriuutigaarpullu ataatsimoorluta siunissami assigiinngisitsisoqannginnissaa qulakkeersinnaassallutigut. 

  
  

• Kalaaliusugut Danmarkimi najugaqartugut akuerineqarnissarput maluginiarneqarnissarpullu kissaatigaarput, utoqqatsertoqarneranilu maanna toqqissisimanerusinnaanngorpugut. Danmarkimi kalaallit ullumikkut siunissamilu immikkoortinneqannginnissarput toqqissisimasumillu inuusinnaanissarput sulissutigaarput.