Uagut – Kalaallit Danmarkimi Najugallit Peqatigiiffiat, innuttaasut pilersaarutaat ’Hands Off Kalaallit Nunaat’ aamma Inuit – Danmarkimi Kalaallit Peqatigiiffiisa Ataatsimut Peqatigiiffiat, Mellemfolkeligt Samvirke suleqatigalugu København-imi, Aarhus-imi, Aalborg-imi, Odense-milu akerliussutsimik takutitsisoqarnissamut qaaqqusipput.

Akerliussutsimik takutitsinerit tamarmik arfininngorpat – januaarip 17-ianni 2026 – amerikamiut aallartitaat Danmarkimut tikeraarnerannut atatillugu ingerlanneqassapput.   

Akerliussutsimik takutitsinermi demokratii inuillu pisinnaatitaaffii aallaavigalugit Kalaallit Nunaata kiffaanngissuseqarnera ataqqeqqullugu ataatsimut oqariartuuteqarnissarput siunertaraarput.

Akerliussutsimik takutitsinerit eqqissisimasumik ingerlanneqassapput. Tapersersuiumasut tamarmik tikilluaqqusaapput.

”Ulluni kingullerni pisut Kalaallit Nunaat aamma inuiaat kalaallit nunatsinni Danmarkimilu najugallit sakkortuumik sunnernikuuaat. Taamaattumik maannakkut ataatsimoornissamut kaammattuuteqarpugut. Aaqqiagiinngittoqartillugu ernumalersarpugut, ilaatigullu ajornartorsiutinik pinngortitsisoorsinnaasarluta. Kalaallit nunatsinni Danmarkimilu najugallit ataatsimoornissaat kaammattuutigaarput,” Julie Rademacher, Peqatigiiffik Uagut-imi siulittaasoq oqarpoq. 

”Amerikamiut Kalaallit Nunaat tiguarniarlugu pilersaarutaat pillugu akerliussutsimik takutitsiniarpugut. Naalagaaffeqatigiiffiup Kalaallit Nunaatalu kiffaanngissuseqarnissaata ataqqineqarnissaat piumasaraarput. Neriuppugut takutissinnaassallugu amerlasuujulluta Kalaallit Nunaat tapersersoripput,” Camilla Siezing, Peqatigiiffik Inuit-imi siulittaasoq oqarpoq.

”Avatitsinnit qunusaarneqaraangatta ataatsimoornissarput naalagaaffeqatigiiffimmilu kalaallit siunissami namminneerlutik aalajangiisinnaatitaanissaat pillugit tapersersuinissarput pisariaqarluinnarput. Neriuppugut inuppassuit akerliussutsimik takutitsinitsinni peqataarusussinnaassasut, amerikamiut nunarsuullu sinnera tamaat naalagaaffiit innuttanut pisussaaffii suli atuuttut takunerussammassuk,” Tim Whyte, Mellemfolkeligt Samvirke-mi generalsekretæri oqarpoq.

”Ulluni makkunani ataatsimoornissarput suleqatigiinnissarpullu pisariaqarluinnarput. Kalaallit Nunaata kiffaanngissuseqarnissaa ataqqineqartariaqarpoq, kalaallillu inuiattut ataqqineqartariaqarlutik. Piumasaqaat una Kalaallit Nunaannut nunarsuarmullu atuuppoq,” innuttaasut pilersaarutaannik ”Hands Off Kalaallit Nunaat”-nik aallarniisoq Poul Johannesen oqarpoq.

Akerliussutsimik takutitsinerit pillugit paasissutissat (naapiffissat, ingerlaarfissallu pillugit) ugguuna pissarsiarineqarsinnaapput:

København: https://www.facebook.com/events/1205231985136038/
Aarhus:  https://www.facebook.com/events/738873212179502/
Odense: https://www.facebook.com/events/1293324089496284/
Aalborg: https://www.facebook.com/events/654434164364100/

Mellemfolkeligt Samvirke-p nittartagaatigut akerliussutsimik takutitsinissat pillugit paasissutissat - ingerlaarfissat, pisussat, il.il. - malinnaaviginissaa eqqaamallugu. 

Tusagassiortunut attavissaq

Apersuinissamut, oqaaseqarnissamut imaluunniit akerliussutsimik takutitsinerit pillugit ilanngutassiinissamut qinnuteqarnermi tusagassiortut pinngitsooratik uunga saaffiginnissapput:

Christina Holm Hansen, pressekontakt
Tlf.: +45 2932 9867
Mail: presse@uagut.dk