TUSAGASSIUUTINUT NALUNAARUT – Isumat pigiliutiinnakkat peqatigiinnerlu kalaallit Aalborg-imi ataatsimiissutigissagaat

8. dec. 2025

Kalaallit qallunaallu isumat pigiliutiinnakkat, peqatigiinneq aamma kulturi pillugit ataatsimiinnissamut qaaqquneqarput. Ukiormanna Kalaallit Nunaat assigiinngitsutigut ukkatarineqarsimavoq, taamaattumillu Landsorganisationen for Grønlændere i Danmark (Kalaallit Danmarkimi najugallit peqatigiiffiat) ”UAGUT”-ip Kalaallit Nunaat sammineqarluarsimanera aallaavigalugu kalaallit tusintilikkaat Danmarkimi najugallit tapersersorumavai. Ukunani kalaallit 3000-it Nordjylland-imi najugaqarput, 1600-illu Aalborg-imi najugaqarlutik.

UAGUT-ip – Kalaallit Danmarkimi najugallit peqatigiiffiata – kalaallit, qallunaat Kalaallit Nunaannillu soqutigisallit oqaloqatigiinnertalimmik ataatsimiigiaqquai. Ataatsimiinneq Kalaallit Illuutaat Aalborg-imi suleqatigalugu aaqqissugaavoq, decembarillu 11-ianni nal. 16.00 – 18.00 Vesterbro 60-imi Aalborgimi pissalluni.

Ataatsimiinnerup kalaallit Danmarkimi najugallit ajornartorsiutaat immikkoortitaasarnerallu oqallisigineqarnerulernissaat siunertaraa – tamanna saniatigut ataatsimoorneq kulturilu aamma ukkatarineqassallutik.

”Peqatigiiffik UAGUT Nordjylland-imut tikilluaqquneqarnissaanut Aalborg-imilu kalaallit qallunaallu ataatsimiinnissaannut qilanaarpugut. Alapernaanneq, oqaloqatigiinneq ataatsimoornerlu aallaavigalugit paasinninnermik ataqatigiinnermillu pinngortitsisoqartarpoq,” Aalborg-imi Kalaallit Illuutaanni pisortaq, Jeppe Bülow Sørensen, oqarpoq.

Saqqummiinerit, tusarnaartitsinerit erinarsoqatigiinnerlu unnummut pilersaarutigaagut, nerisassat imigassallu aamma sassaalliutigineqassallutik.

”Danmarkimi kalaalerpassuuvugut, ataatsimooraangattalu nukittunerulersarpugut. Danmarkimi kalaallit amerlavallaarujussuartut isumat pigiliutiinnakkat immikkoortitaasarnerlu suli misigisarpaat, tamannalu unitsinneqassappat ataatsimut nipeqarnissarput pingaaruteqarpoq. Siunissamut iluaqutaasussamik allanngueqataasinnaallutalu ataqqinninnermik pinngortitsisinnaavugut,” Julie Rademacher, UAGUT-imi siulittaasoq, oqarpoq.

Aalborg-imi ataatsimiinneq tamanut ammavoq – kalaallinut, qallunaanut, ilaqutariinnut ikinngutinullu. Peqataasut tamarmik nerisassaqartinnerussagatsigit nalunaarnissaq piumasaqaataavoq. Nalunaarneq ugguuna pissaaq: https://forms.gle/8QpBFCj31Q8EUtK56

Neriuppugut amerlasuut ataatsimiinnissatsinnut peqataajumaartut.