Piffissami kingullermi pisut nunatsinni aamma kalaallit Kalaallit Nunaanni Danmarkimilu najugallit akornanni aalassatsitsipput. Taamaattumik kalaaliulluta ataatsimoornissarput peqatigiiffitsinnit maannakkut kaammattuutigaarput.

Aalassattoqartillugu ernumalersarpugut, ilaatigullu inuunitsinni akornatsinnilu ajornartorsiutinik pinngortitsisoorsinnaasarluta. 

Oqaloqatigiinneq oqallinnerlu aqqutigalugit iluarsiissutissarsiorneq

Kalaallit Nunaat Danmarkilu tusagassiuutitigut eqqartorneqartarnerat pissutigalugu inuttut immitsinnit avissaaqqanerulersinnaasarpugut. Kalaallit qallunaallu politikerii aaqqiagiinngikkaagata ernumalertarpugut. 

Kulturikkut akunnermiliuttut 17.000-it 

Kalaallit Danmarkimi najugallit 17.000-it missaanniippugut. Danmarkimi najugaqarnissarput nammineq aalajangernikuuarput, kalaallinilu sisamaasuni ataaseq Danmarkimi najugaqartarpoq. 

Amerlanertigut kalaallit qallunaallu oqaasii kulturiallu atugarisarpagut, taamaattumillu qallunaat kalaallillu akornanni akulikitsumik akunnermiliuttunngortarpugut. 

Inuiattut oqaluttuassartatsinni eqqunngitsuliornerit piffissarlu maannakkut inuuffigisatsinni ajornartorsiutigineqartartut ammasumik eqqartorsinnaasariaqarpagut. Inuinnaat pissutsinut ilisarnaatitut (symbolitut) isiginagit ataqqinninnermilli takutitsilluta tamanna pissaaq. Taamaattumik oqaloqatigiittarnitsinni isumaqatigiinnginneq isornartorsiuinerlu inissaqartittariaqarpagut. 

Peqataagitsi – ataatsimoorluta nunarput illersortigu

Tamanna pissutigalugu peqatigiiffik Uagut-ip kalaallit Danmarkimi najugallit oqaloqatigiinnermi peqataanissaat kaammattuutigaa. Tamanna saniatigut inuiaat qallunaat, tusagassiortut politikerillu uagut kalaaliusugut tusarnaaqqulluta kaammattorpagut. 

Qallunaajulluta kalaaliullutalu oqaloqatigiilluarnissarput pisariaqarpoq, nunatta namminersulivinnissaa 'qalipaalluunniit orange' pineqartillugit.

Peqatigiiffik Uagut-mi oqaloqatigiilluarnissaq suliniutigaarput: Ilisimatusarneq, oqallinneq assigiinngisitaarnerlu suliniutigaagut kalaallit qallunaallu akornanni paasinninneq qitiutillugu. 

Tamanna siunertaralugu 2025-imi ukiakkut ataatsimiinnerit oqaloqatigiinnertallit ingerlannikuuagut. Ataatsimiittarnivut 2026-imi attatiinnassavagut: Peqataarusuttut tamarmik tikilluaqqusaapput. 

Julie Rademacher, Peqatigiiffik Uagut-mi – Kalaallit Danmarkimi Najugallit Nuna Tamakkerlugu Peqatigiiffianni – siulittaasoq