Ukiormanna inuit 100-t sinnilaarlugit ilaasortanngorsimasut inuillu 20-t kajumissutsiminnik suleqataalersimasut qutsavigerusuppagut. Juunip 21-iannit ilaasortanngortoqarsinnaanera nalunaarutigigatsigu, sapaatip akunnera ataatsip iluani inuit 100-t ilaasortanngorsimapput. 

Kalaallit Danmarkimi najugallit peqatigiiffeqartariaqarnerat tamanna takutiinnarpaa. 

Suleqatinut periarfissanullu nutaanut qujanaq

Peqatigiiffiit allat suleqatiginerulernissaat ukkatarinikuuarput, ukunani ilaallutik: Kalaallit Illuutaat, Institut for Menneskerettigheder (’Inuit Pisinnaatitaaffii pillugit Instituti’), VIVE – Det Nationale Forsknings- og Analysecenter for Velfærd (’Nuna Tamakkerlugu Atugarissaarneq pillugu Ilisimatusarfik aamma Misissuisarfik’), Stenbroens Jurister, Kalaallit Ilinniartut Peqatigiiffiat AVALAK, Peqatigiiffik Inuit, Kulturikkut Peqatigiiffik Tikiusaaq, Kalaallit Peqqissartut Illuat, Kalaallit Nunaata Sinniisoqarfia il.il. Aappaagu pissarsiaqarnartumik oqaloqatigiittarnissatsinnut qilanaalereerpugut.

Tamanna saniatigut TV2 Go’ Morgen Danmark-imi, Grønland i Tivoli-mi (’Kalaallit Nunaat Tivoli-mi’), Danmarks største kaffemik-imi (’Danmarkimi kaffisortitsineq’) aamma Jul på Slottet-imi (’Illussaarsuarmi Juulli’) peqataavugut. Kajumissutsiminnik sulisut nutaat aamma naapinnikuuagut – sulisut assigiinngitsunik piginnaanillit, tamarmillu kalaallit Danmarkimi najugallit atugarissaarnerulernissaannik kissaateqartut. 

Naapitta (Bryd Isen) – Kalaallit Danmarkimi najugallit immikkoortitaasarnerat akiorparput

2025-imi (2026-imilu) suliniut "Naapitta" (Bryd Isen) aallartipparput. Suliniutip kalaallit Danmarkimi najugallit immikkoortitaasarnerat akiorneqarnissaa ukkataraa. 

Suliniummi oqaloqatigiinnertalimmik ataatsimiittarnivut qitiupput. Ataatsimiinnerit siulliit marluk Aarhus-imi Aalborg-imilu inuit 100-t sinnerlugit ataatsimeeqatigalugit ingerlannikuuagut. 

Ataatsimiinnerit taakkua marluk naammassilluarpagut, tassanilu kalaallit Danmarkimi najugallit misigisartagaat paasisaqarfiginerullugit. Aappaagu – ukioq 2026 – ataatsimiittarnivut nangeqqissavagut illoqarfinni ukunani: Randers-imi, Esbjerg-imi, Odense-mi Københavnimilu. Kikkut tamarmik tikilluaqqusaapput – qallunaat, kalaallit, ilaasortat ilaasortaanngitsullu. Ataatsimiiffissavut ullulerneqarpata nalunaarutigineqarumaarput. 

Kalaaliuvunga – Jeg er grønlænder: Isumaqatissarsiorneq (kampagne)

Ukioq 2026-imi kalaallit kalaaliussusertik tulluusimaarutiginerulissammassuk isumaqatissarsiorneq (kampagne) aallartissamaarparput. Uani kalaallit Danmarkimi oqallisigineqartarnerat qanoq allanngortinneqarsinnaasoq ilaatigut ukkatarineqassaaq. Isumaqatissarsiornerup imarisai ingerlanneqarneralu ataatsimiittarnitsinni eqqartorneqarsimasut aallaavigalugit ilusilersugaavoq. Neriuppugut ikinngutinut nalunngisanullu ingerlateqqikkusussamaarissi. 

Kalaallit inuusuttut Danmarkimi najugallit ilitsersuisoqarnissaat

Kalaallit inuusuttut ilitsersuisoqarnissaat aamma pilersaarutigaarput. Ilitsersuisut misilittagartuut nunatsinneersut inuusuttut Danmarkimi najugallit suliffeqarfeqarfimmi artorsaatigisartagaat pillugit ikiortassavaat. 

Ilitsersuisuunissat ilitsersuisoqarnissalluunniit kissaatigilereerukku attavigisinnaavatsigut: Ilitsersuisoqarneq pillugu paasissutissanik nassiussiumaarpugut. 

Ukioq 2026-imi aamma susoqassava?

Naapitta (Bryd Isen) saniatigut assigiinngitsutigut misissuinissarput aamma pilersaarutigaarput. ’Medienævnet’ pissutigalugu kalaallit Danmarkimi najugallit immikkut ittumik tusagassiuuteqarnissaat qanoq ilusilersorneqassinnaanersoq misissorsinnaalerparput. Peqataarusukkussi nalunaarsinnaalereerpusi – pilersaarut aallartippat paasissutissanik nassiussiumaarpugut. 

’Europa-Nævnet’-ip aningaasaliiffiginikuugamitigut kalaallit EU-mi inissisimanerat misissorsinnaalerparput. Tamanna saniatigut EU-p ulluinnarni inuunitsinnut sunniuteqartarnera aamma misissorsinnaalerparput. 

Politikkikkut oqallittoqartarnermi peqataanissarput aamma pilersaarutigaarput – assersuutigalugu Folketingimi tusarniaanermi Aaja Chemnitz peqatigalugu taavalu Bornholm-imi Mors-imilu inuiattut ataatsimiittarnermi. Assigiinngitsorpassuarnik periarfissinneqarnissarput takorloorparput. 

Qujanarujussuaq

’SIRI – Styrelsen for International Rekruttering og Integration’ (’Nunat Assigiinngitsut Akornanni Ilanngutitaaneq pillugu Aqutsisut’) aallartinnitsinni tapersersorusussimammatigut qutsavigerusupparput. Kalaallit Illuutaanni Aarhus-imi Aalborg-imilu ataatsimiinnerit marluk ingerlassinnaagatsigit aamma qujassutigaarput – saqqummiisorpassuarnut peqataasorpassuarnullu qujanaq. Inuinnaat – soorlu kajumissutsiminnik sulisut – ilisimasaminnik avitseqataanerannut assigiinngitsutigullu suliaqarsimanerannut aamma qutsavigaagut.

Peqatigiiffimmi ilaasortanngorsimasut immikkut ittumik aamma qutsavigaatsigit: Peqataanersi uatsinnut pingaaruteqarluinnarpoq, ingammik suleqatissarsioraagatta oqartussaasunullu saaffiginnikkaagatta. 

Maanna peqatigiiffitsinni ilaasortat 100-t sinnilaarpaat, neriuutigivarpullu aappaagu ilaasortat amerlanerulissasut. 

Neriuutigivarputtaaq ataatsimiittarnitsinni suleqatigiinnitsinnilu isummersueqataarusukkumaartusi. Eqqaamallugu ilaqutasi, ikinngutisi nalunngisasilu peqatigiiffitsinni aamma ilaasortanngorsinnaammata. 

Juullimi pilluaritsi

Neriuppugut tamassi juullisiorluarumaartusi – aappaagu sulinerput nangeqqinnissaanut qilanaalereerpugut. 

Ukiormanna peqatigiiffitsinni ilinniartumik Københavnimi najugaqartumik kalaallisoorsinnaasumik, qallunaatoorsinnaasumik tuluttoorsinnaasumillu suleqatitaarnissarput kissaatigaarput. Ilinniartumik taamaattumik nalunngisaqarussi uatsinnut saaffiginnissinnaavusi. 

Kalaaliulluta oqaatsivut, kulturerput, ataatsimoortarnerput kinaassuserpullu Danmarkimi nukittorneqarnissaat soorunami kissaatiginerpaavarput.

Juullimi ukiutoqqamilu pilluaritsi.