Peqatigiiffik Uagut-ip kalaallit 17.000-it Danmark-imi najugallit atugarissaarnerulernissaat, pisinnaatitaaffeqarnissaat kultureqarnissaallu suliniutigaa. 

Folketingimut qineqqusaarnermi kalaallit Danmark-imi najugallit qineqqusaartut Nunatsinneersut qinersinnaanngilaat, kalaallillu nipaat inuiattut oqallinnermi tammarajuttarput. Taamaattumik Nunarput maannakkut annertuumik eqqartorneqarnera kalaallit inuiattut eqqartorneqarnerulernissaannut saatsinniarsarivarput. 

Nunarput pillugu oqallinneq geopolitikkimut taamaallaat atassuteqanngilaq. Kalaaliuvugut amerlasuut tusaaneqarnissamik pisariaqartitsisut. 

Nunanut Allanut Ministeri Lars Løkke Rasmussen-ip Washington-imi ataatsimiinnermini kalaallit Danmark-imi najugallit eqqartormatigut pingaaruteqarluinnarpoq. Ataqqineqartutut misigivugut, oqaaseqarneratalu Nunatta Danmark-illu ataqatigiinnerat takutippaa. 

Saniatigut kalaaliulluta Danmark-imi ataatsimut nipeqarnissarput oqallinnermilu ilanngunneqarnissarput aamma takutippaa. Taamaattumik nuannaarpugut ullumi Nunanut Allanut Ministeri Lars Løkke Ramussen København-imi allornerit 10.000-it pisuttuaqatigalugu tamanna oqallisigissagatsigu, siulittaasoq Julie Rademacher oqarpoq. 

Pisuttuarnitsinni qallunaat kalaallillu Danmark-imi najugallit siunissami ataatsimoornerulernissaat ilaatigut eqqartussavarput. 

Ataavartumik ikioqatigiilluta anguniakkat ukua angussavagut: 

• Nuna tamakkerlugu iliuuseqarneq

  
  

• Kalaallit kulturiat tapersersorniarlugu aningaasaliineq

  
  

• Kalaallit meerartaat inuusuttortaalu kalaallit oqaasiinik ilitsersuunneqartarnissaat

  
  

• Kalaallit Danmark-imi amerlanerusunik palaseqarnissaat, oqartussaasut akornanni nutserisoqartarnissaat taavalu kalaallit inatsisilerinermut ilanngunneqartarnissaat

  
  

• Kalaallinik sinniisoqartarnissaq, saammaateqatigiinneq, nunat inoqqaavisa pisinnaatitaaffeqarnissaat taavalu kalaallit ikinnerussuteqartutut akuerineqarnissaat. 

  
  

Siulittaasorput Julie Rademacher taavalu Nunanut Allanut Ministeri Lars Løkke Rasmussen pisunnertik Nordatlantens Brygge-mi Christianshavn-imi aallartissavaat. Ilaatigut Christianshavns Torv, Christiansborg taavalu København-imi Kalaallit Illuutaat ilaatigut aqqusaassavaat. 

Qineqqusaarnerup nalaani Uagut partiit assigiinngitsut sammisassaqartitsineranni peqataassaaq kalaallit Danmark-imi najugallit, kalaallit kulturiat, oqaluttuarisaaneq taavalu kulturimik paasinninneq pineqaraangata.