Ippassaq unnukkut aallakaatitassiami oqaatigineqarpoq laktose-mik sapigaqarneq (laktaseenzym pissutigalugu immuup sukkuanik sapigaqarneq) atorlugu qallunaajussuseq uuttorneqarsinnaasoq.

Ilumoorpoq kalaallit amerlasuut immuk sapertaraaq. Qallunaat amerlasuut immuk aamma sapertarpaat, sapigaqarnerli innuttaassutsimut uuttuutitut atorneqarsinnaanngilaq. Tamanna taamatut isiginnittaaseqartut eqqarsariaasaat taamaallaat takutippaa.

Isiginnittaaseq taanna ilisimatusarnerunngilaq. Isiginnittaaseq taanna inuit ammip qalipaataatigut assigiinngisitsineruvoq.

Kalaallit naakkut nappaateqarnermut assiguneqassanngillat

Aallakaatitassiami kalaallit assersuutigineqarnerat annernarpoq. Ukiorpassuit qallunaat akornanni tusaaneqarumanikuulluta kiisami ataqqineqalerpugut.

Alapernaaffigineqarlutalu tusaaneqalerpugut, inuiattullu oqaluttuassarput kiisalu naalagaaffeqatigiiffimmi inissisimanerput ataqqineqaraluttuinnarput. Tamanna sivisuumik utaqqinikuuarput.

Taamaasiortoqarneranili aallakaatitassiami nappaatitut assiguneqarsimavugut. Timivut Danmark-imi inissaqanngitsutut nalilerneqarsimapput. Tamanna peqqarniitsumik eqqunngitsuliorneruvoq.

Nunarsuarmi gen-inik ilisimatusartut tusaamasaanerpaat ilaat, Eske Willerslev-ip, arlaleriarluni "race-p" biologii-kkut uuttuutitut atorneqarsinnaannginnera oqaatiginikuuaa. Inuit sumiussusaat taamatut uuttorneqarsinnaanngilaq.

Taamaakkaluartorli politikerit inuiaassuseq gen-inngortinniarsarivaat. Taamaasiornerat piviusumit ungasillineruvoq, saniatigullu qanga Europa-mi eqqarsartaatsimut uteqqinneruvoq - eqqarsartaaseq atorunnaarsinneqarnikuugaluamut.

Kalaallit tamat oqartussaaqataaneranni peqataapput

Kalaaliuvugut. Qallunaajuvugut. Ataatsikkut marlunnik kinaassuseqarpugut. Inuuvugut, sulisarpugut Danmark-imilu skat-imik akiliisarluta. Meeqqavut qallunaat atuarfianni atuartuupput. Tunuliaqutavut nassarlugit inuiaqatigiinni akuuvugut.

Uagut-imi biologii patsiseralugu innuttaassusermik aalajangiiniarsarineq isumaqatiginngilarput.

Isiginnittaaseq taanna kalaallit Inuit-llu taamaallaat eqqortanngilai - kinaluunniit "eqqortumik qallunaajussuseqanngitsoq timeqanngitsorluunniit" eqqortarpaa.

Qallunaajussuseq timimut atassuteqanngilaq - inuiaqatigiinni akooqataanermut atassuteqarpoq.

Taamaatiinnarniartigu.