Uagut-ip bestyrelsiani ilaasortaq, oqaatsinik ilisimatusartoq Naja Blytmann Trondhjem, ”Hvorfor er det vigtigt, at børn og unge kan tale på deres modersmål?” (”Meeqqat inuusuttullu oqaatsitik atorlugit oqalussinnaanissaat sooq pingaaruteqarpa?”) qulequtaralugu saqqummiissaaq. Ualikkut workshoppernermi aqutsisuussaaq. Workshoppernermi peqataasut kalaallit oqaasii paasisaqarfiginerusinnaavaat. Naja Blytmann Trondhjem ph.d.-juvoq, lektoriuvoq kiisalu Oqaatsinik Ilisimatusarfimmi pisortaalluni.

Nordspråk-imi peqataanerput Uagut-ip kalaallit oqaasii Danmarkimi nukittorsarneqarnissaannut suliniutaanut atassuteqarpoq. Kalaallit oqaasii ilaqutariinnut, kulturimut kinaassutsimullu pingaaruteqarput. Taamaakkaluartorli kalaallit meerartaat inuusuttortaalu amerlasuut kalaallisut oqalussinnaanatik peroriartortarput. Københavnip Kommuniani kalaallisut maannakkut ilinniartoqarsinnaalernikuuvoq, naak ilinniartut 12-iutillugit taamaallaat periarfissaasartoq. Taamaattumik Tænketanken Justitia-p kalaallisut ilinniarnissaq periarfissaviunnginnera nalilernikuuaa.

Uagut-imi Danmarkimi meeqqat, inuusuttut ilaqutariillu kalaallisut ilinniarsinnaanissaat sulissutigaarput. Kalaallisut ilinniarneq meeqqat ulluinnarni inuunerannut naleqqussarneqassaaq, Danmarkimilu najugaq kalaallisut ilinniarsinnaanissamut sunniuteqassanngilaq. Assigiinngitsunik aaqqiissuteqartariaqarpoq, soorlu digitaliusumik imaluunniit kommunit akornanni, kalaallillu oqaasii Danmarkimi piginnaasatut isigineqartalernissaat pingaaruteqarpoq.

Naja Blytmann Trondhjem-ip Nordspråk-imi peqataaneratigut kalaallit oqaasii Nunat Avannarlerni ilinniartitsisut ilisimatusartullu akornanni sinniisoqalissapput. Nunat Avannarlerni allani oqaatsini misilittakkat aqqutigalugit Danmarkimi kalaallit oqaasii atorneqartalernissaat nukittorsarsinnaavaat.