Qupperneq una pisariaqaraangat paasissutissanik nutaanik ilaneqartarlunilu nutserneqartarpoq

Sumi aamma qaqugu?

Aarhus-imi Kalaallit Illuutaanni arfininngorneq marts-ip 21-iani nal. 13:00-mit 15:00 tungaanut qinersisartunik ataatsimiititsinermi peqataagit.

Qinersisartunik ataatsimiititsineq kalaallit Danmark-imi najugalinnut tamanut ammavoq. Ataatsimiinneq qallunaatut kalaallisullu ingerlanneqassaaq - apersuinissamut inissaqarumaarpoq.

Ataatsimiinnermi akunneq kingulleq kalaallit ilinniartut kattuffiata AVALAK peqataassaaq. Tassani kalaallit inuusuttortaat Danmark-imi najugallit ukkatarineqassapput, apersuinissamullu aamma inissaqarumaarluni.

Charlotte Nebel ataatsimiinnermik ingerlatitsisuussaaq, GL Tolk-imiillu nutserisoqassalluni.

Ataatsimiinnermut nalunaarneq pisariaqanngilaq. Nalunngereerukkuli peqataaniarlutit ataatsimoorneq@uagut.dk allaffigisinnaavat - taamatut peqataarusuttut tamarmik nerisaqarnerussapput.

Kalaallit pillugit politikki oqaluuserisassaavoq

2026-imi Folketingimut qineqqusaarnermut atatillugu Uagut qallunaat kalaallillu politikeriisa akornanni kalaallit Danmark-imi najugallit qanoq ataavartumik atugarissaarnerulertissinnaanerlugit paasititsiniaanikuuvoq.

Sammisat ataasiakkaat ilaatigut ukkatarisimavagut, assersuutigalugit:

• Kalaallit oqaasiinik ilitsersuunneqarnissamut periarfissinneqarneq

• Kalaallit kulturiat, kalaallillu nunaminnut atassuteqarnerat

• Danmark-imi kalaaliminernik pisisoqarsinnaanissaa

• Nunat inoqqaavisa pisinnaatitaaffii taavalu ikinnerussuteqartutut akuerineqarneq

• Kalaallit tamat oqartussaaneratigut sinniisoqartarnissaat taavalu inatsisilerinermut ilanngunneqartarnissaat.

Folketingimut qineqqusaarneq 2026-imut atatillugu politikkimut pilersaarusiarput una toorlugu sukumiinerusumik paasisaqarfigisinnaavat.

Siullermeerlutit Danmark-imi qinersissamaarpit?

Siornatigut Danmark-imi taasinikuunngikkuit, Uagut-ip qinersinissamut ilitsersuutaa atuarsinnaavat. Ilitsersuut kalaallisoorpoq, tassanilu ulloq qinersivimmi susoqartarnera paasisaqarfiginerusinnaavat. Ilitsersuut una toorlugu download-ersinnaavat.